Gipataas sa Philippine Red Cross (PRC) ang full alert status sa tibuok organisasyon aron masiguro ang kaandam sa PRC sa bisan unsang posibleng epekto sa Super Typhoon Nando sa nagkalain-laing dapit sa nasud.
Matod sa Red Cross, aktibo nilang gipalihok ang tanan nilang emergency response assets ug volunteers sa lain-laing bahin sa nasod.
Kabahin kini sa ilang contingency plans nga makatubag dayon sa bisan unsang panginahanglanon nga mutungha tungod sa Super Typhoon Nando.
Kini nga mobilisasyon naglakip sa pag-andam sa mga relief goods, medikal nga suplay, ug uban pang kagamitan nga mahimong gikinahanglan sa mga apektadong komunidad.
Ang PRC nakatutok sa paghatag og humanitarian nga tabang sa mga komunidad nga mahimong maapektuhan sa bagyo.
Ang prayoridad sa organisasyon mao ang kaluwasan sa mga lungsuranon ug pagsiguro nga sila adunay igong suporta sa panahon sa kalamidad.
Kalabot niini, ang PRC nipagawas na og mga direktiba ngadto sa Northern ug Central Luzon chapters sa pag-andam sa posibleng pagbakwit sa mga residente, pagtubag sa mga medikal nga emerhensya, ug pag-atubang sa mga pagkabalda sa mga batakang serbisyo sama sa kuryente ug tubig.
