CEBU CITY-Gihulagway sa usa ka opisyal sa dakbayan sa Sugbo nga ang sporting event alang sa mga student athletes nga gipahigayon dinhi sugod sa Hunyo 14-18, 2023 isip kabahin sa pagpangandam sa tinguha sa siyudad nga mahimong host sa Palarong Pambansa sa 2024.
Matud pa sa City Sports Commissioner John Pages nga ang ang Pre-National Qualifying Meet (PNQM) Cluster 3 magpakita nga ang siyudad adunay igo nga mga dulaanan kon kini makadaog sa mga katungod sa pag-host sa nasudnong mga dula sunod tuig.
Gipili sa Department of Education (DepEd) Central Office ug Philippine Sports Commission ang Cebu City isip usa sa mga venue alang sa PNQM, usa ka kalihokan nga gipaila sa DepEd karong tuiga aron maminusan ang gidaghanon sa mga delegasyon sa Palarong Pambansa, mub-an ang gidugayon sa panghitabo, ug ipaubos ang mga galastuhan nga mabuhat tanan nga walay pagsakripisyo sa lebel sa pagdula.
Ang Palarong Pambansa mobalik human sa dul-an sa tulo ka tuig sukad sa pagsugod sa Covid-19 pandemic nga napugos sa pagkansela niini, ug kini ipahigayon sa Marikina City sa Metro Manila gikan Hulyo 29 hangtod Agosto 5.
Adunay upat ka cluster ang PNQM ug kini mao ang Western Visayas, Central Visayas, Eastern Visayas ug Zamboanga Peninsula sakop sa Cluster 3.
Samtang ang ubang mga grupo mao ang Cluster 1 ang Ilocos Region, Cagayan Valley, Central Luzon ug Cordillera Administrative Region; Cluster 2—Calabarzon, Mimaropa, National Capital Region ug Bicol Region; ug Cluster 4 Northern Mindanao, Davao, Soccksargen, Caraga ug Bangsamoro Autonomous Region in Muslim Mindanao.
Matud pa sa DepEd Central Office nga ang top two regional delegations lang matag cluster ang mo-abante sa aktuwal nga Palarong Pambansa event.
