CEBU CITY – Paghatud ug mensahe ngadtu sa mga inahan nga ipaglaban ang ilahang mga anak.
Kini ang gipadayag sa beteranong direktor nga si Carlo J. Caparas hinungdan nga namugna ang kontrobersyal nga true-to-life story nga “Jacqueline Comes Home”.
Una niini, giklaru ni Caparas nga sa wala pa mitaliwan ang iyahang asawa nga si Donna Villa, giingung mihangyu kini nga buhatan ug salida ang nahitabung murder sa Chiong sisters sa dakbayan sa Carcar, probinsya sa Sugbo niadtung tuig 1995.
Subay sa maong katapusang hangyu, giingung namugna ang maong salida pinaagi usab sa anak ni Caparas nga si Isabelle Peach nga maoy direktor niini.
Giklaru sa maong direktor nga wala nila gitutukan ang ligal nga bahin sa maong kaso inay ang kinabuhi sa pamilyang Chiong human ang nahitabung murder, ang kalisud nga nasinati sa pamilya ingun man ang emotional trauma nga namugna sa maong krimen.
Samtang, gibutyag usab ni Caparas nga ilahang ikalipay kung makatabang ang maong salida nga mahatagan ug katin-awan ang publiko sa nahitabu sa managsu-ung Chiong.
Sa laing bahin, gitataw ni Thelma Chiong, ang inahan sa kontrobersyal nga Chiong sisters, nga wala kini musugut sa unang hangyu sa direktor nga si Carlo J. Caparas nga himu-an ug salida ang nahitabung murder ngadtu sa iyahang mga anak.
Matud pa nga ang pagbuhat ug salida niini ang giingung makapapukaw lang sa sakit nga gibati sa pamilya sa nahitabung krimen.
Apan sigon pa nga nakahunahuna kini sa uban pang mga biktima sa susamang krimen nga nahitabu sa iyahang mga anak hinungdan nga misugut na lang kini nga himu-un ang maong salida.
Gi-asuy ni Mrs. Chiong nga daghan usab ang isturya nga mikatap nga iyahang gitagu-an ang usa sa iyahang mga anak nga si Jacqueline Chiong hinungdan nga mitugut nga mahimu ang maong salida arun nga mahatagan ug katin-awan kung kanus-a naka-uli ang iyahang anak.
Sa laing bahin, giangkun ni Mrs. Chiong nga nasakitan siya nga subling mikatap karun ang documentary nga “Give Up Tomorrow” kung diin gipagawas ang habig usab sa suspek sa maong krimen nga si Paco Larrañaga.
Nagkanayun kini nga 20 katuig na ang nakalabay apan giingung mao lang gihapun ang isturya ug siya nga inahan ang migawas sa gihapun nga bati sa mata sa publiko.
Gihimug-atan niini nga isip usa ka inahan, hustisya lang ang iyahang gipangayu alang sa nahitabu sa iyahang mga anak.
