Giangkon sa Department of Justice (DOJ) nga wala kini naghimo og bisan unsang pagpangandam may kalabotan sa posibilidad sa pagsurender o pag-aresto sa mga co-perpetrators ni kanhi Presidente Rodrigo Duterte sa kaso nga giatubang sa International Criminal Court (ICC).
Sumala kang Justice Spokesperson Atty. Polo Martinez, wala pa’y lakang nga gihimo ang departamento tungod kay wala pa man usab gi-isyung warrant of arrest batok sa mga ginganlan nga kauban sa kanhi presidente.
Gipasiugda ni Martinez nga sa pagkakaron, walay opisyal nga dokumento o komunikasyon nga nadawat ang DOJ gikan sa international tribunal nga nagmando sa pagdakop sa mga nalambigit.
Busa, matod niya, walay basihan ang departamento sa paghimo og mga pagpangandam alang sa posibleng pag-aresto.
Giklaro usab sa tigpamaba nga naghulat ang DOJ sa resolusyon sa Korte Suprema sa mga petisyon nga may kalabotan sa kaso sa pag-aresto ni kanhi Presidente Duterte, nga mahimong basehan sa ilang umaabot nga mga lakang kung adunay opisyal nga warrant nga ipagawas ug ipadangat sa ahensya.
Giingon ni Martinez nga gitahod sa departamento ang mga katungod sa matag indibidwal samtang nagpadayon ang ligal nga proseso.
