Luwas nga niabot sila si Presidente Bongbong Marcos ug First Lady Liza Araneta-Marcos sa Phnom Penh sa alas 3:08 sa hapon kagahapong adlawa, aron sugdan ang tulo ka adlaw nga State Visit sa Kingdom of Cambodia, nga gikatakdang sugdan gikan sa Septiyembre 7 hangtod 9, 2025.
Sa maong pag-abot niini, gi ab-iabi sila sa mga opisyal sa Philippine Embassy, pinangulohan ni Ambassador Flerida Ann Camille Mayo.
Ang state visit sa Presidente kay usa ka reciprocal gesture human sa opisyal nga pagbisita sa Pilipinas ni Cambodian Prime Minister Hun Manet niadtong Pebrero 10-11, 2025.
Isip sa pagpakita sa iyang lawom nga pasalamat alang sa mga Filipino sa gawas sa nasud, si Presidente Marcos magsugod sa iyang State Visit pinaagi sa usa ka miting uban sa Filipino community sa Cambodia.
Subay niini, gilauman nga ilhon ni Presidente Marcos ang mahinungdanong kontribusyon sa mga Pilipino—ilabi na niadtong nagtrabaho sa mga sektor sa edukasyon ug serbisyo—ug ipasiugda ang ilang mahinungdanong papel sa ekonomikanhon ug sosyo-kultural nga kalamboan sa Pilipinas ug Cambodia,diin mokabat sa 7,500 ka mga Filipino ang kasamtangang nagpuyo ug nagtrabaho sa Cambodia.
Samtang alang sa iyang ikaduhang adlaw, ang Presidente mohimo og bilateral nga miting uban ni Punong Ministro Hun Manet aron hisgutan ang nagkalain-laing importanteng isyu, lakip ang pag-diversify sa pamatigayon, pagpausbaw sa kooperasyon batok sa transnational nga mga krimen, pagpausbaw sa turismo, ug pagpalig-on sa kolaborasyon sa mga sektor sama sa agrikultura, mas taas nga edukasyon, ug serbisyo sa kahanginan.
