Gi-abi-abi si Presidente Ferdinand Marcos Jr. sa dihang pag-abot niini sa India alang sa iyang lima ka adlaw nga state visit.
Ang eroplano nga gisakyan sa presidente nitugpa sa Indira Gandhi International Airport sa New Delhi.
Diin giubanan kini sa pagbisita ni First Lady Liza Araneta-Marcos ug sa iyang delegasyon nga giabiabi sa mga opisyal sa India ug gihalaran sa tradisyonal nga sayaw sa India.
Human sa maong pagsugat, nilahos ang presidente sa Taj Mahal Hotel alang sa usa ka courtesy call uban kang Indian External Affairs Minister Dr. S. Jaishankar ug usa ka briefing sa iyang pagbisita sa estado.
Samtang karong adlawa, makigtagbo usab kini kang Indian President Droupadi Murmu, ingon man ang bilateral meeting tali ni Marcos ug Indian Prime Minister Narendra Modi aron hisgutan ang lig-on nga relasyon tali sa India ug Pilipinas.
Niatubang na usab kini sa Filipino community kauban ang mga kaubang gabinete diin pipila ka mga hisgutanan ang iyang gipaambit lakip na niini ang mga plano nga matukod tali sa duha ka nasud.
Gidayeg usab niini ang sakripisyo ug kamaayo sa mga Pilipino nga gipakita sa laing nasud diin bitbit ang pangalan sa Pilipinas.
