Gipanghimakak ni Presidente Ferdinand Marcos Jr. nga aduna silay papel sa pag-impeach kang Bise President Sara Duterte.
Giingon niini nga ang executive branch walay interes sa impeachment.
Gitataw sa presidente nga dili kalikayan nga hisgutan ang nasangpit nga butang sa matag higayon nga makigkita sila kang Speaker Martin Romualdez ug pipila ka mga kongresista.
Gikwestiyon usab sa presidente ang maong plano sa mga kongresista ug niingon nga dili na kini kalikayan tungod kay nagpadayon na ang impeachment.
Sa higayon nga mapasaka na ang impeachment, matod niya wala na silay mahimo tungod kay mao kini ang mandato sa mga magbabalaod nga nalatid sa konstitusyon.
Mag-obserbar lang siya ug dili moapil ang executive branch sa mga impeachment trials.
Gisultihan usab niini ang anak nga kongresista nga si Ilocos Norte First District Rep. Sandro Marcos sa pagbuhat sa iyang katungdanan sa konstitusyon sa pagtubag sa impeachment mao nga kini ang unang nakapirma sa ikaupat nga impeachment complaints batok sa Bise Presidente.
Masaligon usab ang Presidente nga ang pag-uswag sa impeachment dili makaapekto sa pagtubo sa nasud.
Una na nga ang Presidente nagkanayon nga dili siya gusto nga ang mga magbabalaod moduso og impeachment tungod kay dili kini makaayo sa katawhan.
