Gilunsad ni President Ferdinand Marcos Jr. ang usa ka bag-ong digital platform nga nagtumong sa paghimo sa tanang mga galastohan sa gobyerno nga mas bukas, mas accessible, ug may tulubagon sa publiko.
Ang bag-ong sistema gitawag og Centralized Open Monitoring Platform for Appropriations and Spending Statistics o DBM COMPASS, nga gihimo sa Department of Budget and Management.
Sa samang higayon, gipangulohan usab sa Presidente ang pag-apruba sa gi-update nga Philippine Public Financial Management Reform Roadmap 2024–2028 aron mapalig-on ang pagdumala sa pinansyal sa nasud.
Sumala ni Presidente Marcos, ang kwarta sa katawhan para sa katawhan, busa katungod sa matag Pilipino nga makita ug masubay kung asa padulong ang ilang mga buhis nga gipangabudlayan.
Pinaagi sa DBM COMPASS, ang publiko adunay online portal nga adunay mga interactive chart aron dali nga makit-an ang mga badyet, obligasyon, ug aktuwal nga kwarta nga gipagawas sa matag ahensya ug rehiyon.
Gimandoan sa Presidente ang tanang ahensya sa gobyerno nga i-align ang ilang mga badyet sa mga nag-unang prayoridad sa nasud ug pauswagon ang ilang pagreport ug pagmonitor sa mga proyekto.
Gipasiugda niya nga aron mapadayon ang pagsalig sa katawhan, dili igo nga ang badyet husto sa papel, apan kinahanglan nga mabati kini sa katawhan.
