Midepensa ang legal team ni South Korean President Yoon Suk Yeol nga wala mohimog insurrection sa dihang iyang gideklarar ang martial law niadtong Disyembre 3.
Sa usa ka media briefing sa Seoul, ang tigpamaba sa legal nga team ni Yoon nga si Seok Dong-hyeon nangutana kung asa sa kalibutan ang usa ka lider nagdeklarar og insurrection atubangan sa usa ka live press conference?
Kahinumduman nga si Pres. Yoon, nideklarar og martial law sa live nga telebisyon, apan gibawi kini sa presidente pipila ka oras ang milabay human sa pagsupak sa mga magbabalaod sa South Korea.
Nangutana ang kampo ni Yoon kung asa siya makakitag insurrection nga natapos ra usab sulod sa 2 o 3 ka oras tungod kay gipugngan sa National Assembly ang martial law.
Kahinumdoman, nga ang mga magbabalaod sa SoKor, miinsister nga mosulod sa parliament aron mobotar batok sa martial law bisan pa man sa presensya sa mga gipakatap nga sundalo human madeklarar ang martial law.
Sa pagkakaron, pabiling gisuspenso si Yoon sa iyang gahom isip presidente human siya gi-impeach sa mga magbabalaod niadtong Sabado. Bisan og wala pa siya hingpit nga napalagpot, tungod sa balaod sa South Korea, ang Constitutional Court ang mohukom kon ipadayon ba ang impeachment motion sa National Assembly sulod sa 6 ka bulan.
Sa laing bahin, gimando sa Korte si Yoon sa pagsumite sa iyang martial law decree ingon man ang mga rekord sa mga miting sa gabinete nga iyang gihimo sa wala pa ug pagkahuman sa deklarasyon sa martial law.
Gitakda sa korte ang preliminary hearing sa impeachment ni Yoon karung Disyembre 27, bisan kung dili kinahanglan nga motambong ang Presidente.
