Gibalhin ni Senate President Francis Escudero ang presentasyon sa Articles of Impeachment batok kang Bise Presidente Sara Duterte ngadto sa Hunyo 11 imbes sa Hunyo 2 aron tugotan ang Kongreso nga molihok sa dinalian nga prayoridad nga mga lakang sa dili pa ang sine die adjournment niini.
Ang pagpresentar sa mga artikulo sa impeachment usa ka kinahanglanon sa pagpatawag sa Senado isip impeachment court.
Ang bag-ong iskedyul nagtakda sa pormal nga transmission sa alas-4 sa hapon sa Hunyo 11, 2025.
Sa usa ka sulat nga gitumong ngadto kang House of Representatives Speaker Ferdinand Martin Romualdez niadtong Huwebes, si Escudero niingon nga ang desisyon gihimo human sa tigom sa Legislative-Executive Development Advisory Council (LEDAC) nga gipahigayon sayo sa susamang adlaw.
Giila sa Konseho ang 12 ka mga prayoridad nga balaudnon nga gilauman nga tukion ug ipasa sa mga magbabalaod sulod sa katapusang unom ka adlaw sa sesyon sa 19th Congress.
Gawas niana, gitumbok usab ni Escudero ang pending nga kompirmasyon sa kapin sa 200 ka presidential appointments, lakip ang tulo ka Cabinet secretaries, upat ka constitutional commission officials, 39 foreign service officers, ug 277 Armed Forces of the Philippines officers, sa Commission on Appointments sa pagbalik sa lehislatura sa Hunyo 2.(Bombo Irene Ardiente)
