CEBU CITY – Gisa-aran ni Presidente Rodrigo Duterte nga mapahimutang sa tarung nga lugar ang mga biktima sa landslide sa Sitio Sindulan, Barangay Tinaan, dakbayan sa Naga, probinsya sa Sugbo.
Kini ang nahimung pamahayag sa presidente sa dihang mibisita kini sa mga evacuees sa Enan Chiong Activity Center sa nahisgutang dakbayan.
Matud ni Duterte nga gagmay lang nga balay ang iyahang mahatag apan gisiguru niini nga tarung kining kapuy-an.
Subay niini, ipadala sa presidente si Gen. Eduardo Del Rosario, ang chairperson sa Task Force Bangon Marawi arun mao usab ang manguna sa pagtukud sa panimalay sa mga biktima sa landslide sa Naga.
Una nang gipahibalu ni Naga City Mayor Christine Chiong nga adunay government-owned lot ang dakbayan kung diin mamahimung tukuran ug panimalay alalng sa mga landslide victims, butang nga gikalipay sa presidente.
Nasayran nga nahimung emosyonal si Presidente Duterte sa dihang nakita ang gilaray nga mga patay ingun man ang mga naghu-ut nga evacuees sa evacuation center.
Samtang gihimug-atan usab ni Duterte nga ipahunung niini ang tanang mining operations sa nasud gumikan kay gawas nga nakagugba kini sa kinaiyahan, giingung gibutang usab sa delikado nga kahimtang ang mga tawu nga anaa nagpuyu du-ul sa minahan.
