Gipirmahan na ni Presidente Ferdinand R. Marcos Jr. ang Republic Act 12233, o ang Judiciary Fiscal Autonomy Act, usa ka lakang nga naghubit sa gidak-on ug kinutoban sa fiscal independence sa hudikatura isip usa ka managsama nga sanga sa gobyerno.
Ang bag-ong balaod, nga gipirmahan sa Malacañang atubangan sa mga magbabalaod ug mga opisyal ug personahe sa Korte Suprema (SC), nagpamatuod sa probisyon sa konstitusyon nga ang budget sa hudikatura dili mapaubos ubos sa alokasyon sa miaging tuig ug kinahanglang awtomatiko ug regular nga ipagawas human maaprobahan sa kongreso.
Ubos sa maong lakang, ang SC mahimong mosumiter sa orihinal nga budget proposal niini direkta ngadto sa Kongreso, isip attachment sa National Expenditure Program nga giandam sa Department of Budget and Management (DBM), nga mahimong mosumiter sa mga komento niini nga gilain.
Matud sa Presidente, nga ang bag-ong balaod magtugot sa mga pundo nga awtomatikong ma-disburse sa hudikatura ug magtugot sa SC sa pag-organisar pag-usab sa mga opisina, pag-hire og mga kawani nga mas paspas ug pag-desentralisa sa mga operasyon aron mapaduol ang mga serbisyo ngadto sa katawhan.
Samtang, giaprobahan usab sa Kongreso ang kataposang bersyon sa balaudnon, usa ka konsolidasyon sa Senate Bill No. 2982 ug House Bill No. 11358, niadtong Hunyo 11, 2025. | Bombo Nathaniel Sandoval
