Gikatakdang mobiyahe si Presidente Ferdinand Marcos Jr. paingon sa India.
Sumala ni Department of Foreign Affairs (DFA) Spokesperson Assistant Secretary Analyn Ratonel, motambong ang Presidente sa BRICS Summit gikan sa Septyembre 12 hangtod sa 13.
Gihimo ang biyahe sa Presidente subay sa imbitasyon ni Indian Prime Minister Narendra Modi.
Mouban sa Presidente sa maong biyahe sila si First Lady Liza Araneta-Marcos, Foreign Affairs Secretary Ma. Theresa Lazaro, Information and Communications Technology Secretary Henry Aguda, ug Finance Secretary Frederick Go.
Ang BRICS usa ka internasyonal nga organisasyon nga gilangkuban sa Brazil, Russia, India, China, Egypt, Ethiopia, Indonesia, Iran, South Africa, ug United Arab Emirates. Diin naghatag ang maong kalihokan og higayon sa Presidente aron ipasabot ang mga prayoridad sa Pilipinas isip chair sa ASEAN alang sa tuig 2026.
Ingon man nga magpahigayon usab og tigom sila si Presidente Marcos ug Prime Minister Modi aron hisgutan ang pagpalig-on sa ekonomiya sa duha ka nasod ug pagrepaso sa implementasyon sa lima ka tuig nga action plan nga naglangkob ning tuig 2025 hangtod 2029.
Makigtagbo usab ang Presidente sa mga lider sa negosyo sa India aron subayon ang mga saad sa pamuhunan nga gihimo atol sa iyang miaging pagbisita.
Atol sa iyang pagbisita sa miaging tuig, nakakuha ang Presidente og $5.8 bilyon nga kantidad sa mga saad sa pamuhunan—usa ka resulta nga iyang giisip nga usa ka mabungahon kaayo nga biyahe sa gawas sa nasod.
