Nagtagbo silang Presidente Ferdinand R. Marcos Jr. ug Russian President Vladimir Putin sa sideline sa ASEAN-Russia Commemorative Summit aron hisgutan ang pagpalapad sa kooperasyon sa patigayon, enerhiya, agrikultura, ug seguridad sa pagkaon.
Gipasabot ni Presidente Marcos ang kamahinungdanon sa regular nga konsultasyon tali sa duha ka nasod ug iyang gipahayag nga daghan pa ang mamahimong pagatuyokan sa pagtinabangay, ilabi na sa enerhiya ug seguridad sa pagkaon.
Isip chairman sa ASEAN, giimbitahan usab ni Presidente Marcos si Presidente Putin sa ika-21 East Asia Summit nga ipahigayon sa Maynila sa bulan sa Nobyembre.
Sa bahin usab ni President Putin, iyang gihatagan og gibug-aton nga adunay lig-on nga tradisyon sa pagtahod ug pagkakahigalaay ang Pilipinas ug Russia. Gihisgutan usab niya ang dakong potensyal alang sa mas halapad nga kooperasyon sa patigayon, agrikultura, ug enerhiya.
Gidugang pa ni Putin nga niadtong miaging tuig, nilapas sa tunga sa bilyong dolyar ang kantidad sa bilateral trade sa duha ka nasod. Matud pa niya, aduna nay mga naglungtad nga cooperation mechanisms ang Pilipinas ug Russia, lakip na ang Joint Russia-Philippines Commission on Trade and Economic Cooperation, nga mamahimong agianan aron mas mapalambo pa ang relasyong pang-ekonomiya sa duha ka nasod.
Ang maong panagpulong gipahigayon dungan sa pagsaulog sa ika-50 nga anibersaryo sa diplomatikong relasyon sa Pilipinas ug Russia.
