CEBU CITY-‘Sakit’ pero kinahanglan nga dawaton tungod kay naa matud pay balaud.
Kini ang pamahayag ni Jesus Ranoco Negro Jr. kinsang usa sa mga piniriso nga nakagawas tungod sa GCTA nga misurender usab kagahapon sa Bogo PS human gitagaan og 15 days ultimatum ni Presidente Rodrigo Duterte.
Nagkanayon si Negro nga sa dihang nakita niya nga nag live ang presidente ug gipasurender sila pagbalik wala na siya naglangay pa tungod kay balaud man kini nga angay sundon.
Sakit lang matud pa niya nga gibawi ang unta kagawasan na niya.
Apan gisaysay usab ni Negro nga dili unta siya ganahan nga mugawas tungod kay mahadlok siya nga i-salvage o balikan sa complainant apan wala siya mahimo kay pagawson man gyud siya. Gani wala na matud pa siya gilakip sa kaon sulos sa prisohan tungod kay gawasnon na siya.
Lisod usab matud pa ang kinabuhi sa prisohan ug boot nalang niini nga bitayon siya para mahuman ang iyang pag-antos.
Nasayran nga convicted si Negro sa mutiple counts of murder apan sulod sa prisohan wala matud pa siya nagbuhat og daotan nahimo pa siyang magtutudlo sa highschool sa Bilibid. Ug tungod kay nakita matud pa sa BuCor ang iyang pagbago gipa-ubos siya sa colony status para matagaan og GCTA.
Dugang pa niini nga nabag-ohan siya sa iyang pagawas tungod kay dagko na matud pa ang mga building og daghan na og mga sakyanan.
Mensahe usab ni Negro sa presidente nga kung utruhon ang balaud mas maayo pa nga bitayon nalang ang mga piniriso. Ug iya matud pa nga nakat-unan sulod sa prisohan nga dili tinood nga ang usa ka binilanggo dili mabag-o kinahanglan lang matud pa nga e-edukar kini butang nga iyang gipasalamatan ang BuCor sa pag-edukar kaniya.
Kung matagaan matud pa og kahigayonan ang piniriso nga magbago unta tagaan matud pa og higayon.
Gi-awhag usab ni Negro ang kaubanan niini nga musurender na usab sanglit kung tinood kini nga nagbago, musurender gyud kini.
