CEBU CITY- Nagpabiling stable ang presyo sa basic commodities sa mga supermarket sa Cebu, sumala sa Department of Trade and Industry Cebu-Central Office (DTI Cebu).
Sumala sa ahensya, padayon nilang gimonitor ang presyo sa mga produkto, ilabi na karon nga adunay tensyon sa Middle East tungod sa gubat, aron masiguro nga masunod ang suggested retail price o SRP.
Sa interview sa Bombo Radyo Cebu, gipahayag ni Atty. Airene Abapo, Chief sa Consumer Protection Division sa DTI-Cebu, nga wala pa silay namonitor nga supermarket nga nagbaligya og produkto nga molapas sa SRP.
Matud pa sa opisyal, gisusi usab sa ilang monitoring kung adunay igo nga supply sa mga produkto ug kung adunay problema sa logistics ug delivery gikan sa manufacturers padulong sa mga supermarket.
Apan sa pagkakaron, wala silay nakitang kakulangan sa supply ug wala usab problema sa delivery sa mga produkto.
Gipasabot usab sa DTI nga ang presyo sa mga agricultural products sama sa utan, bugas ug uban pang produkto sa uma kasagaran gimonitor sa Department of Agriculture.
Gidasig usab sa ahensya ang publiko nga mosumbong kung makabantay og tindahan nga nagpataka og pataas sa presyo sa mga produkto.
Kung mapamatud-an ang paglapas sa Price Act of the Philippines ug Consumer Act of the Philippines, mahimong atubangon sa establisemento ang multa nga magsugod sa ₱10,000 hangtod ₱2 milyon.
