CEBU – Dako ang posibilidad nga adunay paglihok sa presyo sa mga nag-unang palaliton subay sa nagsingabot nga Pasko, diin ang mga kunsomidor kay nagsugod na usab ug panggawas.
Gipahibalo ni Nanette Arbon, ang regional director sa Department of Trade and Industry Central Visayas, nga gitutokan karun sa ilahang national office ang pag-monitor sa mga presyo sa ‘basic and prime comodities’ kung angayan ang maong mga produkto ug umento sa suggested retail price (SRP).
Matud pa, mukabat sa kapin 200 ka mga produkto ang ilahang gi-monitor matag semana sa mga nag-unang syudad, samtang binuwan ang monitoring sa mga munisipalidad, diin ilahang nakita nga stable man ang mga presyo ug sulod lang kini sa ilahang SRP.
Gitino niini nga katapusan nila nga gipagawas ang SRP kay niadto pang August 15, 2022 ug hangtud karun giingong gisunod man sa gihapon sa mga negosyante, lakip na ang mga mall.
Gidugang pa ni Arbon nga gawas sa nagsingabot nga Pasko, lakip sa ilahang gilantaw nga rason sa paglihok sa presyo mao ang mga panghitabo sa ‘global scene’ sama na lang sa padayon nga kagubot sa Ukraine ug Russia, ingon man ang epekto sa COVID-19 pandemic ug uban pa.
Samtang, giklaro usab niini nga wala sila nag-monitor sa presyo sa softdrinks gumikan kay wala man kini malakip sa ‘basic and prime comodities’, apan ilahang gi-monitor ang presyo sa asukar diin sa pagkakarun kay stable pa man ug ‘accessible’ lang kini sa publiko.
