Namatay si Félicien Kabuga, usa sa mga nag-unang suspek sa 1994 Rwandan genocide, samtang nagpaabot sa iyang husay sa International Criminal Court sa The Hague, sumala sa United Nations.
Gikumpirma sa International Residual Mechanism for Criminal Tribunals nga si Kabuga namatay sa usa ka ospital niadtong Sabado, Mayo 16, sa edad nga 90.
Dugay nang giisip si Kabuga nga usa sa labing gipangita nga mga pugante sa kalibutan tungod sa iyang giingong papel sa pagpondo ug pagsuporta sa 1994 Rwandan genocide, diin gibanabana nga kapin sa 800,000 ka mga tawo ang namatay sulod lamang sa pipila ka bulan.
Giakusahan si Kabuga nga usa sa mga nagpaluyo sa Radio Télévision Libre des Mille Collines o RTLM, usa ka estasyon sa radyo nga giingong nag-aghat sa mga etnikong Hutu sa pagpatay sa mga Tutsi atol sa genocide.
Gituohan usab nga siya nag-apod-apod og mga machete ug misuporta sa mga grupong nalambigit sa daghang pagpamatay.
Niadtong 2020, gidakop si Kabuga sa Paris human sa halos tulo ka dekada nga pagtago-tago, diin giingong migamit siya og lain-laing peke nga identidad ug mga pasaporte.
Human sa iyang pagkadakop, gibalhin siya sa The Hague aron moatubang sa mga kaso nga genocide, conspiracy to commit genocide, incitement to genocide, ug mga krimen batok sa katawhan, lakip na ang pagpatay ug pagpuo.
Hugot nga gihimakak ni Kabuga ang tanang alegasyon ug miangkon nga dili sad-an atubangan sa korte.
Niadtong 2023, gipahunong sa mga huwes ang husay human siya gideklarar nga dili na angayan, tungod sa iyang nagkagrabeng pisikal ug mental nga kahimtang, aron ipadayon pa ang pag-atubang sa husay.
Gimando usab ni Presiding Judge Graciela Gatti Santana ang usa ka hingpit nga imbestigasyon sa hinungdan ug mga kahimtang nga may kalabotan sa kamatayon ni Kabuga.
