Mahimong mobayad og minilyon dolyares nga legal fees si Prince Harry ug uban pang mga celebrity, human mapildi sa usa ka kaso sa privacy lawsuit batok sa publisher sa Daily Mail sa United Kingdom.
Sa usa ka hearing sa High Court sa London, ang kampo sa Associated Newspapers nangayo sa mga nagdemanda nga mobayad sa dakong bahin sa ilang mga gasto sa legal, nga miabot na og £34.5 milyon o halos 46 million US dollars.
Si Prince Harry usa sa mga napildi sa kaso, uban sa mag-aawit nga si Elton John ug lima pa ka mga celebrity. Gibasura sa korte kaniadto ang ilang mga pasangil nga ang Daily Mail nalambigit sa ilegal nga mga kalihokan, lakip ang giingong pag-hack sa telepono ug uban pang mga paglapas sa pribasiya.
Sumala sa abogado sa Associated Newspapers, ang mga nagdemanda walay igong ebidensya aron pamatud-an ang ilang mga pasangil, hinungdan nga mitaas ang gasto sa husay.
Samtang, ang kampo ni Prince Harry miingon nga ang legal fees sa publisher sobra ra kaayo ug mitanyag nga mobayad og £8 milyon isip advance payment.
Ang korte gikatakda nga ipadayon ang hearing aron modesisyon kung pila ang angay ibayad sa mga nagdemanda sa legal nga gasto sa Associated Newspapers.
