Gipaniguro sa pamunuan sa Inayawan National High School (INHS) nga luwas ang mga tinun-an nga mosulod ug magtungha sa maong tunghaan, bisan pa man sa mga nanggawas nga bahad o hulga sa seguridad.
Sa pakighinabi sa Bombo Radyo Cebu kang Maria Fe Macul, ang School Principal sa INHS, iyang gipasalig ngadto sa mga ginikanan ug mga magtutudlo nga kontrolado ang sitwasyon ug aduna silay gipatuman nga mga pamaagi aron mabantayan ang kaayohan sa tanan.
Diin gawas sa mga guard, anaa usab ang presensya sa mga sakop sa kapulisan, inubanan sa suporta sa barangay kapitan, ingon man metal detector aron masiguro gayud nga walay makasulod nga mga hinagiban.
Kini nga pasalig giluwatan sa prinsipal nunot na sa mga sunod-sunod nga mga mabalak-ong insidente nga namantala sa dakbayan nga naghatag og kahadlok sa publiko, ilabi na sa mga pamilya sa mga estudyante.
Matod ni Macul, nakig-alayon na sila sa mga lokal nga otoridad ug sa barangay aron mapalig-on pa ang seguridad sa palibot sa tunghaan, ug nanawagan na usab siya sa komunidad nga magpabiling kalmado apan mabinantayon sa tanang higayon. via Bombo Jun Salde
