NEGROS ORIENTAL-Maayo karun ang dagan sa imbestigasyon sa Police Regional Office (PRO 7) kalabot sa pagpatay kang Negros Oriental Governor Roel Degamo.
Sa pakighinabi sa Bombo Radyo Cebu kang Police Lieutenant Colonel Gerard Ace Pelare, ang tigpamaba sa Special Investigation Task group (SITG)-Degamo, gibutyag niini nga aduna na’y resulta sa ilahang gipahigayon nga pag-berepikar sa mga armas nga gigamit sa mga suspek sa pagpatay sa gobernador.
Apan gitino niini nga dili pa nila mapagawas ang kinatibuk-ang impormasyon sa naasoy nga resulta gumikan kay nagpadayon pa ang ilahang imbestigasyon.
Matud pa, adunay mga armas nga walay traces ug serial numbers hinungdan nga padayon ang ilahang coordination kung adunay link sa mga tag-iya ug kung nasayod kini sa nahitabo nga krimen.
Sa pagkakarun kay nagpadayon ang ilahang hot pursuit operation kauban ang Armed Forces of the Philippines alang sa pagkasikop sa uban pang mga suspek.
Gisiguro ni Police Lieutenant Colonel Pelare nga aduna sila’y gihuptan karun nga substantial information nga nakahatag kanila ug maayo nga direksyon sa ilahang gipahigayon nga imbestigasyon.
