CENTRAL VISAYAS-Hingpit na nga andam ang Police Regional Office 7 alang sa tinuig nga Sinulog sa Carmen nga ipahigayon karong dominggo, Enero 28 nga adunay tema nga “Maghiusa ug magtambayayong alang kang Señor Sto Niño, ang Principe sa kalinaw”, human sa malampuson, han-ay ug luwas nga Sinulog 2024 nga gipahigayon sa South Road Properties nga walay dagkong insidente nga natala.
Matod pa ni Police Lieutenant Colonel Gerard Ace Pelare, ang tigpamaba ni Police Brigadier General Anthony Aberin nga susama sa seguridad nga ilang gihatag sa Sinulog grand parade niadtong Enero 21, mao usab ang ilang buhaton sa Sinulog sa Carmen.
Nasayran usab nga si Aberin mismo ang mosusi sa venue sa Carmen arun masuta kon pila ka police personnel ang kinahanglang ipakatap sama sa miaging tuig nga selebrasyon.
Sa pakighinabi sa Bombo Radyo Cebu News Team kang Police Captain Charlie Santiago, ang OIC sa Carmen Municipal Police Station, ingon niini nga anaa na sa 196 ka mga security forces lakip na ang force multipliers nga gi-deploy alang sa maong kalihokan.
Gawas sa maong ihap, aduna usab mga augmented nga mga forces gikan pa sa laing probinsya.
Mipasalig usab nga madungagan ang security forces nga ipakatap sa mga rota sa parada, ingon man sa mga parking areas.
Subay niini, mipahimangno ang kapulisan sa Carmen nga hugot usab ang ilang seguridad kabahin sa mga gidili sama sa mga hinagiban hilabi na sa mga mosaksi ug mosalmot sa ilang kalihokan.
