Mipahinumdom ang Police Regional Office 7 (PRO-7) sa publiko nga ang Commission on Elections gun ban pabiling epektibo hangtod Hunyo 11, 2025, bisan pa sa pagtapos sa 2025 nasyonal ug lokal nga eleksyon.
Nagsugod ang gun ban niadtong Enero 12, nga nagdili sa dili awtorisado nga pagdala, ug paghupot sa mga armas ug uban pang makamatay nga mga hinagiban sa publiko. Gidili usab niini ang pagpanarbaho sa mga tanod o security personnel nga walay saktong accreditation gikan sa COMELEC.
Gihimug-atan ni PRO-7 Regional Director, Police Brigadier General Redrico Maranan, nga ang mga operasyon sa pagpatuman sa balaod sa tibuok Central Visayas nagpadayon aron masiguro ang padayon nga pagsunod sa mga pagdili nga may kalabotan sa eleksyon.
Nakatala ang PRO-7 ug 397 ka mga kalapasan sa gun ban, gikan sa Enero 12 hangtod Mayo 18, 2025, nga misangpot sa 407 ka mga nasikop ug nasakmit sa 424 ka mga armas lakip na ang 407 ka gagmay nga armas, 3 ka light weapons, 3 ka replica o improvised firearms, 3 ka eksplosibo, ug 1,206 ka mga bala.
Kini nakab-ot pinaagi sa hugot nga COMELEC checkpoints, police responses, patrols, anti-illegal drug operations, ug uban pang nakatutok nga law enforcement activities.
Giawhag sa PRO7 ang publiko nga i-report ang bisan unsang paglapas sa gun ban o kadudahang kalihokan sa labing duol nga istasyon sa pulisya o pinaagi sa mga opisyal nga hotline.
Ang pagpatuman sa COMELEC gun ban nahimong kabahin sa nasudnong inisyatiba aron masiguro ang kalinaw ug kahapsay sa tibuok panahon sa eleksyon, nga opisyal nga matapos sa Hunyo 12, 2025. | Bombo Nathaniel Sandoval
