CENTRAL VISAYAS-Gipakatap ang kapin sa 22,000 ka mga pulis sa mga estratehikong lugar sa rehiyon aron masiguro ang umaabot nga Barangay ug Sangguniang Kabataan Elections, matod sa PRO-7.
Gitino ni Police Lieutenant Colonel Gerard Ace Pelare, tigpamaba sa Police Regional Office in Central Visayas (PRO-7) director Police Brigadier General Anthony Aberin, nga sa nagkaduol na ang eleksiyon, ug walay hunong ang ilang pagpangandam.
Matod ni Pelare, ang Philippine National Police (PNP) kasamtangang nagpakatap og 22,069 ka police personnel nga gitahasan aron masiguro ang malinawon ug hapsay nga election period sa rehiyon.
Gipaabot usab sa umaabot nga mga adlaw ang dugang deployment.
Gidugang ni Pelare nga atol sa pagsugod sa filing sa certificates of candidacy niadtong Agosto 28, 2023, nagpahigayon usab og COMELEC checkpoints ang kapulisan sa nagkadaiyang lugar sa tibuok rehiyon.
Sa laing bahin, gidugang sa opisyal nga wala pay desisyon sa posibleng pag-postpone sa BSKE sa probinsya sa Negros Oriental karong tuiga.
Apan, andam sila sa bisan unsa nga desisyon sa COMELEC sanglit aduna silay duha ka contingency plan nga giandam alang sa security coverage sa probinsiya.
