CENTRAL VISAYAS- Gipahigayon karong adlawa sa Camp Sergio Osmeña Sr. ang Drone Skills Competition sa Police Regional Office 7 (PRO-7) aron masukod ang kahanas sa mga kapulisan sa paggamit og drone, ilabi na sa mga sitwasyon nga nagkinahanglan og dali ug tukmang tubag.
Gitumong sa kompetisyon ang pagsusi sa abilidad sa mga kapulisan sa pag-operate sa drone sa mga emergency response scenarios sama sa surveillance, search and rescue, ug situational assessment.
Sumala sa PRO-7, ang kalihokan usa ka lakang aron mapalambo pa ang disaster preparedness ug law enforcement operations sa rehiyon pinaagi sa epektibong paggamit sa modernong teknolohiya.
Sa pagkakaron, adunay 140 ka drones ang PRO-7 nga gilukop sa tanang police stations sa Central Visayas, matag estasyon adunay kaugalingong drone.
Gipasiugda ni Regional Director Police Brigadier General Redrico A Maranan ang importansya sa regular nga praktis sa drone operation ug nag-awhag sa mga kapulisan nga mahasa sa teknolohiya.
Matod pa niya, ang drone usa ka mahinungdanong gamit nga makapakunhod sa katalagman sa mga pulis ilabi na sa mga rally, protesta, ug uban pang delikadong operasyon.
Ang maong kalihokan nagpakita sa tinguha sa PRO-7 nga gamiton ang teknolohiya aron mas luwas, mas intelihente, ug mas epektibo ang pagpangserbisyo sa katawhan.
