CENTRAL VISAYAS-Mopahigayon og imbentaryo ang PNP Police Regional Office sa Central Visayas (PRO 7) sa mga personahe niini nga nadistino sa Negros Oriental ug Siquijor mahitungod nga nabuwag na kini karon sa rehiyon sa Central Visayas.
Kini human gipirmahan ni Presidente Ferdinand Marcos Jr. niadtong Hunyo 13, 2024 ang Republic Act 12000 o mas nailhan usab nga Negros Island Region (NIR) Act, nga nagtumong sa paghiusa sa mga probinsya sa Negros Occidental, lakip ang Bacolod City, Negros Oriental, ug Siquijor.
Sa pamahayag ni Police Lieutenant Colonel Gerard Ace Pelare, ang tigpamaba ni PRO 7 Director Brigadier General Anthony Aberin, nga ilang gipaabot ang budgetary ug personnel restructure sa kapulisan sa duha ka naasoy nga rehiyon.
Sa pagkakaron, adunay 1,800 ka pulis sa Negros Oriental Police Provincial Office, ug 420 nga kapulisan sa Siquijor Police Provincial Office lakip ang non-uniformed personnel.
Gustong masayran sa PRO 7 ang gidaghanon sa mga pulis gikan sa Sugbo nga nadestino sa bag-ong natukod nga Negros Island Region ingon man pila ka mga police personnel nga nadestino sa Negros Oriental ug Siquijor ang gikan sa Sugbo ug Bohol.
Dili na bag-o sa kapolisan sa maong division sa Central Visayas region tungod kay ang susamang mga pagsuway gihimo niadtong 2015 apan wala madayon ang maong lakang.
