CENTRAL VISAYAS- Mikabat na sa 527 ka loose firearms ang nasakmit sa Police Regional Office sa Central Visayas (PRO 7) pinaagi sa ilang gipakusog nga operasyon isip pagpangandam sa umaabot nga midterm elections karong Mayo 12, 2025.
Matod sa PRO 7, 15,528 ka mga checkpoints ang gihimo sa tibuok rehiyon sukad sa pagpatuman sa Commission on Elections (Comelec) gun ban niadtong Enero 12, ning tuiga, nga miresulta sa pagkasikop sa 170 ka mga suspek.
Diin sa mga dinakpan, 96 ang nasikop sa nagkadaiyang police operations, 45 atol sa drug bust, 23 sa ubang law enforcement operations, ug unom sa Comelec checkpoints.
Hinungdan nga gidayeg ni Police Brigadier General Redrico Maranan, ang hepe sa PRO 7, ang iyang mga personahe sa pagsunod sa iyang mando, sama sa pag-establisar og 24 oras nga checkpoints aron masiguro ang kalinaw ug kahapsay sa tibuok Central Visayas atol sa election period.
Bisan kung wala’y natala nga mga insidente nga may kalabotan sa eleksyon sa rehiyon, ang mga regular nga ronda, pagpaniid, ug mga operasyon sa paniktik magpadayon sa pagbantay sa kapulisan nga alerto ug mapugngan ang bisan unsang hulga sa seguridad.
Ang deployment sa mga special police units gitumong sa pagsiguro sa dali nga pagtubag sa bisan unsang emerhensya o kasamok nga may kalabutan sa eleksyon.
Matud ni Maranan nga ang kalampusan sa luwas ug malinawon nga piniliay kay nagdepende sa kooperasyon sa kapolisan, Comelec, ahensya sa gobyerno, ug komunidad.
Giawhag ni Maranan ang publiko nga magpabiling mabinantayon, mosunod sa mga balaod sa eleksyon, ug panalipdan ang ilang katungod sa pagbotar sa responsableng paagi.
