CEBU PROVINCE-Gisiguro ni Gobernador Gwen Garcia nga andam na ang Pasigarbo sa Sugbo street dancing ug grand ritual showdown karong Agosto 27.
Hinungdan nga ang nagpatawag siya og final coordination meeting kabahin sa nagkalain-laing pagpangandam sa maong kalihukan.
Atol sa meeting gitaho sa mga stakeholders nga sa kinatibuk-an, andam na sila sa umaabot nga kalihukan nga mahitabo sa dakbayan sa Carcar, ilabi na sa bahin sa logistics, kaandam sa imprastraktura, akomodasyon sa mga contingent, power ug internet connection stability, seguridad, ug trapiko, ug uban pa.
Gitawag nga labing dako nga kongregasyon sa mga festival sa Probinsiya sa Sugbo, ang Pasigarbo ug gilauman nga modani sa liboan ka mga tumatan-aw sa venue ug minilyon nga online viewers gikan sa sulod sa nasud ug sa gawas sa nasud.
Giawhag ni Gobernador Gwen ang mga hingtungdan nga nalambigit nga ang tanang mga plano ingon man ang mga contingencies kinahanglang tagdon og maayo aron masiguro ang hapsay nga pagpatuman sa kalihokan.
Daghang mga VIP ang gilauman nga motambong sa kalihokan, apan ang ilang mga ngalan gipugngan sa pagkakaron.
