Gikatakdang mopirma og sisterhood agreement ang Probinsiya sa Sugbo ug Romblon nga nagtumong sa pagpasig-uli sa karaan nga relasyon diin maglangkob sa nagkalain-laing natad sa kooperasyon, lakip na ang pagdumala ug sa turismo.
Mao kini ang tanyag ni Cebu Governor Gwendolyn Garcia nga gidawat dayon ni Romblon Gov. Jose “Otik” Riano atol sa benchmarking nga pagbisita niini sa Cebu Provincial Capitol.
Matud pa ni Garcia nga ang connection tali sa Probinsiya sa Sugbo ug Romblon kay dili gayud mahimo nga kalimtan.
Ang delegasyon sa Romblon, gilangkuban sa kapin 160 ka mga opisyal, naglakip kang Kongresista Eleandro Jesus “Budoy” Madrona, mga mayor, bise mayor, ug mga opisyal sa barangay kay nagtinguha nga makakat-on sa best practices sa Cebu hilabi na sa turismo, komersiyo, lokal nga pagdumala, ug kalamboan.
Mipahayag si Gobernador Gwen og pagkamalaumon bahin sa potensyal nga panagtambayayong, ilabina sa pagpahimulos sa reputasyon sa Romblon isip “Marble Capital of the Philippines.”
Nagtuo siya nga ang kasabutan sa sisterhood mag-abli sa mga pultahan alang sa kolaborasyon sa pamatigayon, turismo, ug pagbinayloay sa kultura, ug uban pa.
