CEBU CITY – Problema sa magti-ayon ang gi-atubang ni Bohol Provincial Board Member Rey Niño Boniel ug Bien Unido Mayor Gisela Boniel.
Kini ang gibutyag ni Brgy Poblacion, Bohol Kapitan Magno Otida sa dihang nahinabi sa Bombo Radyo Cebu.
Gipahibalo ni Kapitan Otida nga niadtong mga nakalabay nga adlaw giingong aduna silay panagpulong nga gipahigayon sa panimalay mismo ni Board Member Boniel apan wala diha ang asawa niini nga si Mayor Boniel.
Matud pa nga nahisgutan sa board member nga aduna gayud silay problema magti-ayon apan wala niini mahisguti kung unsang klase sa problema.
Sigon pa ni Otida nga kung utang man gani ang problema giingong aduna may igong negosyo ang magti-ayon nga makasarang nga makabayad.
Samtang gihulagway usab sa kapitan nga maayong tawo si Mayor Boniel ug wala kini madungog nga adunay bisyo ug talagsa ra usab nga magpakita sa ilahang lungsod kung diin makita lang kung adunay importanti nga pirmahanan.
Giingong lakip na ang bana niini nga si Board Member Boniel ang walay bad record sa ilahang lungsod ug usa kini ka hilumon ka tawo hinungdan nga dili gayud sila makatuo nga mao kini ang principal suspect sa maong krimen.
Hinuon, gibutyag sa kapitan nga daan nang adunay migawas nga istorya nga adunay third party sa kaminyoon sa duha.
Kung mahinumdoman, usa ang third party nga gilantaw karun nga motibo sa kapulisan sa nahitabong krimen.
