CEBU CITY — Niboluntaryo si Cebu City Vice Mayor Michael ‘Mike’ Rama sa lokal nga pangagamhanan sa dakbayan nga panguluhan ang pagsolbad sa problema sa kasapaan sa syudad.
Kini human nga nakasinati ang Cebu City sa grabeng pagbaha niadtong nakalabay’ng Martes sa gabie, Oktubre 13, diin ni-awas ang mga dagkong sapa sa dakbayan, ingon man ang mga kanal human nga nababagan sa mga basura nga gilangkuban sa mga plastic.
Gihimug-atan ni Rama nga kinahanglang ma-relocate ang mga pamilya nga nakalapas sa 3-meter easement sa kasapaan sanglit delikado ang mga nahisgutan sa disgrasya ingon man aron malimpiyuhan usab ang mga sapa.
Lakip sa gipasigarbo sa bise mayor ang pagpatrabaho sa Mahiga creek diin girelocate matod pa niini ang mga pamilya nga iligal nga nagmontar sa ilang mga panimalay, ngadto sa North Reclamation area.
Kahinumduman nga tulo ang namatay lakip na ang na-missing nga 16-anyos nga lalake human sa grabeng pagbaha nga nasinati sa siyudad niadtong Martes gabie human nibundak ang kusog nga uwan. (report by Bombo Jun Salde/gbs/gn)
