Aprobado na sa Cebu Provincial School Board (CPSB) ang procurement sa school supplies para sa tuig 2026 ubos sa Department of Education (DepEd) Cebu Provincial Division.
Gipangulohan ang CPSB ni Cebu Governor Pamela “Pam” Baricuatro atol sa ilang panagpulong sa Kapitolyo diin itagana ang mga supply para sa mga tinun-an sa mga pampublikong tunghaan sa probinsya.
Apan ang maong board wala pa naka-finalize sa insaktong budget allocation para sa DepEd Cebu Provincial Division kay nag-agad pa kini sa ihap sa mga enrollees sa umaabot bag-ong school year sunod tuig.
Matod pa ni Dr. Senen Priscillo P. Paulin, ang Schools Division Superintendent nga base sa ilang datus kay aduna kiniy 886,711 enrollees karong tuiga ug gipanglantawan ang pagsaka sa 10% sa sunod school year.
Ang mga items nga gipang-procure kay mao ang mga school bags, pad paper, notebooks, pens, lapis, crayons, rulers, ug bisan mga sandals.
Kung tugutan sa pundo, ang board gikonsiderar usab ang pagpamalit sa tumblers ug document bags para sa mga magtutudlo.
Gitaho ni Cebu Provincial Treasurer Atty. Roy Salubre nga ang school board adunay fund balance sa kapin P1.143-bilyones as of Nobyembre 27, 2025.
