CEBU – Gibutyag sa Department of Agriculture sa Negros Oriental nga kuwang ra ang produksyon sa bugas humay ug bugas mais sa lalawigan tungod sa kakuwangon sa yutang gitamnan hinungdan nga nag-import sa ubang lugar.
Subay niini, gisaysay ni Department of Agriculture (DA) – 7 Regional Agriculture and Fisheries Information Section Chief Cheryl Dela Victoria atol sa pakigtabo sa mga miyembro sa Association of Negros Oriental Public Information Officers (ANOPIO) nga ang mga inisyatibo nga gihimo sa ahensya nagsubay sa direktiba ni President Bongbong Marcos isip ecretary usab sa DA.
Giklaro ni Dela Victoria nga gitutokan nila ang paghatag og igong suplay sa pagkaon alang sa sa mga Pilipino, taliwala sa pandemya ug nagkamahal nga presyo sa abono ug palaliton.
Nasayran nga gigahinan karon ang lalawigan og 200 bilyones pesos nga budget sa 2023 alang sa ‘Farm to market road’ nga proyekto sa pagtabang sa mga mag-uuma nga mapadali ang paghatod sa ilahang mga produkto paingon sa merkado.
