Gikuwestiyon ni Tedoy Navea, usa ka Environmentalist, ang tahas sa Environmental Management Bureau-7 sa mga planong pagpatukod og landfill facilities og pagpahamtang niini sa mga angay nga manubag sa mga kalapasan nga nakita hilabi na sa pagkahugno sa Binaliw Landfill niadtong Enero 8. 2026
Matud ni Navea, nga ang pagmaniho sa mga landfill facilities nakalatid sa RA 9003 o ang Ecological Solid Waste Management Act, diin hugot nga gipatuman ang segregation sa mga basura og ang tukma nga paagi sa pagpadagan sa mga nagkadaiyang pasilidad diin matud pa sukwahi sa nakita sa Landfill facility nga nahimutang sa Barangay Binaliw.
Sigon niini, kuwestiyonable ang pagpa-imbistigar sa Department of Environment and Natural Resources gumikan kay wala nila pahamtangi ang kalapasan nga nga nakita sa Binaliw, sukwahi sa ilang tahas nga nakalatid usab sa balaod nga mo imbistigar og mopahigayon og regular nga pagsusi sa mga pasilidad.
Gihimug-atan usab ni Navea, nga parehas nga angay manubag ang kagamhanan sa Dakbayan sa Sugbo og ang buhatan sa DENR gumikan kay dili mapatukod ang maong pasilidad og dili aprobado sa LGU hilabi na og adunay Environmental Compliance Certificate nga gitunol sa buhatan.
Dugang pa niini, nga uyon siya sa pamahayag ni DENR Secretary Rafael Lotilla, nga magpahigayon og nationwide investigation sa tanang landfill facilities apan gikuwestiyon kini kung unsa ka seryuso og kalig-on ang maong lakang.
Gibutyag usab niini nga kinahanglang adunay independent body ang mo imbistigar sa trahedya sa Barangay Binaliw og dili mismo ang DENR ang mangunay niini gumikan kay posible kining manipula.
Samtang sa pikas bahin, abli usab si Navea sa mga posibleng pagmugna og laing landfill apan kinahanglang nahiuyon kini sa tukmang paagi og sa balaod gumikan kay maapektuhan gayud ang katawhan og ang kina-iyahan.
