Gipresentar na sa plenaryo sa Senado ang Magna Carta of Barangay Health Workers proposal (Senate Bill 2838).
Ang katuyoan sa maong sugyot mao ang pagpanalipod ug pagpasiugda sa kaayohan sa mga BHW sa tibuok Pilipinas.
Matod sa sponsor sa maong proposal nga si Senador JV Ejercito nga kining maong sugyot magsilbi nga pag-ila sa ilang serbisyo ngadto sa publiko.
Ubos sa sugyot, ang tahas sa usa ka BHW itakda pinaagi sa pagtino sa mga parameter sa ilang tahas sa paghatag ug first aid ingun man ang pag-atiman sa kahimsog sa ilang mga komunidad.
Matod ni Ejercito, mapanalipdan niini ang mga BHW gikan sa paghimo og mga trabaho nga lapas sa ilang katungdanan ug responsibilidad.
Kini nga sugyot naglatid usab sa pagparehistro sa lokal nga health board sa lungsod o siyudad diin ang interesadong tawo gustong moserbisyo isip BHW.
Adunay usab orientation ug pagbansay-bansay gikan sa DOH aron masiguro nga ang matag BHW kuwalipikado ug physically ug mentally fit.
Gisugyot usab ang national BHW information system, nga magsilbi nga masterlist sa tanang BHWs mapalambo pinaagi sa tabang sa Department of Information and Communications Technology (DICT) lakip usab niini nga makabutang ug salary grade alang sa mga BHW.
