Nagpabilin nga adunay bentaha o “lamang” ang prosekusyon sa padayong impeachment trial batok kang Bise Presidente Sara Duterte, matod pa ni Atty. Rameses Victorius Gatchalian Villagonzalo, usa ka Cebuano ug accredited lawyer sa International Criminal Court (ICC).
Matod ni Atty. Villagonzalo sa eksklusibong pakighinabi sa Bombo Radyo Cebu kaniya, malapuson nga gipagawas sa prosekusyon ang mga iregularidad, ingon man ang legal ug factual nga basihan kon ngano disallowed o dili pwedeng dawaton ang pipila sa mga gigasto.
Iyang gitudlo nga ang mga ebidensya pareho sa mga acknowledgment receipts, dili gyud pwedeng dawaton subay sa probisyon sa allowable expenditures. Pipila sa pananglitan nga gigastohan gamit ang intelligence fund mao ang Tree planting ug Awarding ceremonies.
Gidugang pa niya, kini nga mga aktibidad walay bisan gamay nga kalabotan sa intelligence gathering.
Giklaro usab sa abogado nga ang patakaran sa audit compliance dili lang para kamg VP Sara, kundi para sa tanang pampublikong opisyal.
Diin, bisan kinsa pa nga opisyal ang mosumiter og sayop nga dokumento o mogasto sa intelligence fund alang sa mga disallowed nga aktibidad, ma-disallow gyud kini sa COA.
Tungod niini, nagpabilin nga mas paborable ug mas lig-on ang posisyon sa prosecusyon sa pagkakaron basi sa obserbasyon ni Atty. Villagonzalo.
