BOMBO EXCLUSIVE: Gihulagway ni Atty. Rameses Victorious Gatchalian Villagonzalo, ICC Accredited Lawyer, nga ang “protective custody” nga gi-avail ni Senador Ronald dela Rosa sa Senado temporaryo lamang nga protective measure atol sa tensyon nga may kalabotan sa giingong ICC warrant batok sa senador.
Matud sa abogado, ang maong hakbang gibase sa kahadlok nga basin dili mahatagan og hustong legal protection ug due process si Dela Rosa kon adunay kalit nga pagpatuman sa usa ka international warrant pinaagi sa Interpol o ubang law enforcement agencies.
Apan gipasiugda ni Villagonzalo nga ang protective custody dili permanente ug dili usab makapuli sa pormal nga legal nga proseso nga kinahanglan sundon sa bisan unsang international tribunal o korte.
Matud pa niya, kon adunay ICC proceedings nga magpadayon ug maaresto ang usa ka akusado, kasagaran ibutang kini sa kustodiya sa ICC sa The Hague samtang nagpadayon ang pre-trial ug trial proceedings.
Dugang pa sa abogado, ang tinuod nga pagpatuman sa bisan unsang arrest warrant kinahanglan moagi lamang sa otorisadong law enforcement agencies sama sa Interpol ug National Bureau of Investigation (NBI), ug dili pinaagi sa pribadong indibidwal o dili awtorisadong personahe.
Gisulti usab ni Villagonzalo nga adunay lain-laing legal remedies nga mahimong gamiton sa kampo ni Dela Rosa, lakip ang pagdangop sa mga korte sa Pilipinas, pagpangayo og temporary restraining order (TRO), ug paggamit sa mga probisyon sa extradition laws aron supakon o malangan ang posibleng implementasyon sa ICC warrant.
