Nakatala og gatusan ka mga kaso sa leptospirosis ang mga tambalanan nga ubos sa pagdumala sa probinsya sa Sugbo sa 16 ka mga Provincial Hospital.
Kini ang gibutyag ni Doctor Mary Ann Josephine Arsenal, ang pangulo sa Integrated Provincial Health Office, diin gibana-bana nga anaa 175 ka mga kaso sa leptospirosis ang natala sa kagamhanan sa Probinsya.
Apan giklaro niini nga dili pa kini ang kinatibuk-ang kaso sa probinsya gumikan kay wala pay labot niini ang mga kaso nga anaa sa mga nagkadaiyang pribadong tambalanan.
Sigon usab niini nga ipaubos usa sa confirmatory test ang maong mga kaso pinaagi sa Research Institute for Tropical Medicine kon RITM una kini ideklara gumikan kay aduna pay mga spicemen nga ipaubos niini.
Gipahibalo usab ni Arsenal, nga adunay gibana-banang 7 ka mga kaso ang nakalas na nga kinabuhi ubos sa mga tambalanan sa Probinsya sa buwan sa Nobyembre.
Giawhag usab sa Doktora nga daling moadto sa mga tambalanan kon ugaling makasinati og mga sintomas sa leptospirosis sama sa; hilanat, trangkaso, og pagpanakit lawas.
