CEBU CITY-Gi-activate na ang Provincial Joint Security Coordinating Center duha ka adlaw sa dili pa magsugod ang election period alang sa Barangay ug Sangguniang Kabataan elections.
Nagtagbo kagahapon ang mga sakop sa joint security coordinating center arun hisgotan ang pagpangandam sa umaabot nga pinili-ay.
Gipahibalo ni Police Major Nolan Tagsip, ang tigpamaba sa Cebu Police Provincial Office (CPPO), nga usa sa mga highlight sa maong tigom mao ang hiniusang aksyon sa law enforcement agencies arun nga masiguro nga malinawon ug malampuson ang pagpahigayon sa pinili-ay.
Matud sa CPPO nga sugdan na nila ang pagpatuman sa Comelec gun ban karung Lunes, Agosto 28, 2023.
Gidugang ni Tagsip nga makalaum ang publiko og mga checkpoint sa kapulisan sa probinsiya sugod sa adlaw nga Lunes.
Gawas pa niini, kabahin usab sa pagpangandam sa seguridad sa kapulisan mao ang pagpahugot sa kampanya batok sa loose firearms nga posibling gamiton sa pagbuhat og krimen may kalambigitan sa umaabot nga eleksyon.
