PROVINCE OF CEBU-Gisalmotan sa tanang pampublikong tunghaan ubos sa Department of Education sa Probinsiya sa Sugbo ang Opening Ceremonies sa Provincial Sports and Cultural Meet ubos sa temang “One Cebu: Through Sports and Culture,” nga gipahigayon sa City Of Naga Sports Field Oval gahapong adlawa.
Nasayran nga mokabat sa 9,000 ka mga atleta nga nagrepresentar sa mga lungsod sa Probinsya ang makigtigi sa 24 ka sports categories ug 7 cultural events sa mosunod nga unom ka adlaw, diin ang mga mananaog nga teams makakuha og kahigayonan nga morepresentar sa Sugbo sa regional meet.
Ingon man nga ang naasoy nga opening ceremonies gitambongan ni Cebu Governor Gwendolyn Garcia, mga mayor sa lungsod ug sa Probinsiya sa Sugbo nga mi-uban sa ilang mga atleta ug sports officials, ug mga opisyal sa Department of Education sa rehiyon.
Gani, si Garcia usab uban sa mga mayor sa lungsod sa Sugbo, nanguna sa pagpasiga sa ‘torch’ aron opisyal nga ablihan ang tibuok semana nga Cebu Provincial Sports and Cultural Festival sa City of Naga Sports Field Oval.
Subay niini, ang mga estudyanteng atleta gikan sa elementarya ug high school level sa Department of Education Cebu Province magtigi sa kahigayonan nga makarepresentar sa Sugbo sa Central Visayas Regional Athletic Association o mas naila nga CVIRAA.
