CEBU CITY – Gilauman ni Undersecretary Jose Joel Sy Egco, ang executive director sa Presidential Task Force on Media Security (PTFoMS), nga adunay makonbikto sa Maguindanao massacre case diin usa ka dekada nang nagsinggit ug hustisya ang pamilya sa 58 ka mga namatay sa insidente.
Sa eksklusibo nga pakighinabi sa Bombo Radyo Cebu kang Usec. Egco, gibutyag niini nga nahuman na ang trial ug promulgation na lang ang ilahang gipaabot diin una nang gi-extend gikan sa Nobyembre 20 ngadto na sa Disyembre 20.
Nanghinaut ang opisyal nga sa dili pa ang Christmas break hayan makapagawas na ang korte ug desisyon sa napulo na katuig nga kaso.
Kahinumdoman nga una nang misaad si Usec. Egco nga mukanaug sa iyahang pwesto kung ugaling walay principal suspect nga pamilya nga guilty sa nahisgutang kaso.
Gitataw ni Egco nga dili niini gusto nga unhan ang desisyon sa korte apan matud pa nga susamang walay hustisya kung walay makonbikto ug ma-acquit lang ang principal suspect.
Nagpasalamat kini sa 192 ka mga witness nga giisip niining mga ti-unay nga bayani, pamilya sa mga biktima nga bisan pa man sa taas nga panahon wala gayud mubuhi sa kaso ug padayong nakigbisog, ingon man ang mga prosecutor sa maong kaso.
Kahinumdoman nga niadtong Nobyembre 23, 2009 gibanhigan si Vice Mayor Esmael ‘Toto’ Mangundadatu ug ang pamilya niini nga paingon unta mu-file sa certificate of candidacy lakip na ang convoy niini hinungdan sa kamatayon sa 58 ka mga tawo diin 32 niini ang mga sakop sa tigbalita.
Lakip sa namatay ang chief of reporter sa Bombo Radyo Koronadal nga si Bombo Bartolome ‘Bart’ Maravilla.
