CEBU CITY — Gisita sa mga sakup sa City of Talisay Traffic Operation Development Authority (CT-TODA) ang mga jeep de pasaheroan nga nagbyahe ug Minglanilla, Naga ug Carcar human kini nga mag-trip cutting o wala musunud sa ilahang rota.
Gibutyag ni Jonathan ‘Joy’ Tumulak, ang head sa CT-TODA, nga aduna sila’y nadawat nga reklamu kalabut sa trip cutting kung diin kutub na lang sa Tabunok, Talisay ang mga multicab nga nagbyahe-an ug Southern Cebu, ug dili na kini mulahus.
Subay niini, naghimu ug aksyon ang CT-TODA kalabut sa maong reklamu ug gipang-atangan ang nahisgutang mga sakyanan.
Ubay-ubay ang nasita nga mga driver kung diin gipang-imbargohan kini ug mga sign board, ingun man nga gikuha-an ug hulagway ang mga lisensya niini arun nga ma-monitor sa hingtungdan nga ahensya.
Nasayran nga sa maong reklamu ang mga pasahero nga gikan sa dakbayan Sugbo nga mukanaug unta sa Minglanilla, Naga, San Fernando ug Carcar ang pakanaugon sa Tabunok ug Lawaan sa dakbayan sa Talisay. (SBR)
