CEBU CITY-Balhog sa prisohan ang usa ka pulis human kini nangmaltrato ug walo ka mga batan-on nga sakop sa contigent team sa Kumbira Festival sa lungsod sa Compostela atol sa Pasigarbo sa Sugbo 2024.
Nahitabo ang maong insidente sa training session sa team niadtong adlaw sa Sabado sa gabii Agosto 24 sa Guadalupe Elementary School diin mao ang billeting area sa maong pundok.
Giila ang dinakpan nga pulis nga si Police Corporal Ronnie Ray Montejo, 34-anyos ug sakop sa hanay sa kapulisan gikan sa Compostela Municipal Police Station.
Ang walo ka mga biktima kay lumulupyo sa lungsod sa Compostela nga naglangkob ang edad gikan sa 16 ngadto sa 22 ang panuigon.
Gitahasan ang maong mga pulis aron paghatag ug seguridad sa mga performers.
Subay sa maong pangitabo nga ang mga choreographers nangayo sa tabang sa mga pulis aron pagpatuman sa instructions ini sa ilang formation apan isog nang timpla sa emosyon ang maong pulis hinungdan nga nanghapak kini sa baga nga kahoy sa mga kamot sa mga batan-on.
Apan tungod sa sobra rang aksyon isip disiplina ang maong pulis hinungdan nga gi-report kini sa mga choreographers sa Guadalupe Police Station.
Sa pagkakaron, si Montejo gipaubos sa kustodiya sa Guadalupe Police Station, diin mag-atubang kini og kasong physical injury ug kalapasan sa Republic Act No. 7610 o Anti-Child Abuse Act.
Gisuwayan pa og pagkuha sa komento ang maong pulis, apan nagdumili kini sa paghatag sa iyang habig.
