Cebu City-Sikop ang usa ka aktibong pulis sa gipahigayun nga buybust operation sa nagkahi-usang pwersa sa Counter-Intelligence Task Force (CITF) ,Regional Intelligence Division ug Provincial Intellegence Branch sa Cebu Provincial Police Office sa Brgy Tuyan, lungsod sa Naga, probinsya sa Sugbo.
Matud ni PIB Head Police Supt. Jonathan Yape nga anaa sa listahan niini sa high value target ang subject sa buybust operation nga si PO2 Ronjie Nadora, 37 anyos, kanhing miyembro sa Special weapons and tactics (SWAT) ug kasamtangang anaa na-assign sa Regional Personnel Holding Admin Unit sa Police Regional Office-7. Una niini, nakadawat ug text message gikan sa mga residente sa Brgy. Tuyan ang Counter-Intelligence Task Forces nga kapulisan kalabot sa ilegal nga mga aktibidad sa subject.
Dali usab kining giberipika sa RID ang nahisgutang report ug sa dihang nakumpirma kini kay nagpahigayun dayun ug buybust operation. Nakuha gikan sa subject ang 8 ka gagmay nga pakete nga nag-unod sa gituohang shabu. Kahilakun kini samtang giposasan na ug isakay sa police patrol para dal-un sa PRO-7.
Nasayran nga naa sa holding unit sa PNP si Nadora mahitungod sa gi-atubang niining administrative case kaniadtong nadakpan kini nga anaa sa sulod sa drug den samtang nag-pot session niadtong Hulyo, sa niaging tuig.
Anaa na karon kustodiya sa RID ang nadakop nga pulis ug gi-andam na ang kasong ipasaka batok niini.
