Cebu City- Padayon nga giimbestigahan karon sa mga kapulisan sa Cebu City Police Office ang kaso sa pagpusil patay sa usa ka police officer ganihang udto sa dalan MJ Cuenco Avenue niining dakbayan sa Sugbo.
Matud ni Police Supt Ryan Devarasm , ang hepe sa Investigation, Detection and Management Branch sa CCPO nga base sa ilang inisyal nga impormasyon mahimo nga personal grudge ug gumikan sa trabaho ang motibo sa krimen.
Matud pa nga gikan sa hearing ang biktima nga si PO2 Kenneth Pogoy kinsang kasamtangan nga naasign sa Lanao Del Norte Provincial Police Office sa dihang gibanhigan kini sa mamumuno nga nakasakay sa motorsiklo.
Gibutyag ni Devaras nga base sa ilang inisyal nga impormasyon daghan na sab nasikop sa mga police operation ang biktima maong posgible nga dunay nagdumot niini.
Nasayran nga gisundan sa mamumuno ang biktima samtang nag drive kini sa iyahang motorsiklo ug human sa insidente dali sila nga miikyas.
Sa inisyal usab nga imbestigayon gikaingong duha ka lalaki nga sakay sa motorsiklo maoy responsable sa krimen diin ang backrider maoy nagsilbing gunman.
Giverify pa usab sa PNP ang taho nga si Pogoy ang nalakip sa listahan sa mga narco cops ni Presidente Rodrigo Duterte.
