CEBU CITY — Padayong gisubay ang koneksyon tali sa nahitabong pagpamusil-patay sa usa ka babaye ug ang paghikog sa usa sa mga sakop sa Sawang Calero Police Station kagabii.
Una niini, gipusil sa wala mailhing mga gunmen ang biktimang si Ritchie Nepomuceno kagabii sa Brgy. Basak-Pardo, dakbayan sa Sugbo.
Si Nepomuceno mao ang usa sa mga reklamante batok sa 11 ka mga sakop sa Sawang Calero Police Station kinsang gipasanginlang nalambigit sa ginadiling drugas, pagpanglugos, ug pagpangilkil.
Apan pagkalabay sa pipila ka oras, nagpakamatay ang usa sa mga gireklamuhan nga si Police Staff Sgt. Celso Colita sulod sa buhatan sa RPDEU-7.
Gisaysay ni Police Major Glenn Hife, ang hepe sa RPDEU-7, nga gipatawag nila ang 11 ka mga narelibuhang sakop sa nahisgutang presinto subay sa nagpadayon nilang imbestigasyon.
Sa eksklusibong interview sa Bombo Radyo, gitug-an ni Hife nga naghilom-hilom si Colita sa dihang gipahibalo niini ang kamatayon ni Nepomuceno ug naghinuktok.
Matud ni Hife nga nananghid si Colita kaniya nga mo-adto sa CR apan nakadungog kini og pagbuto pagkataud-taod.
Diha nakaplagan ang duguong lawas ni Colita diin anaa sa iyang tapad ang kalibre 45 nga armas.
Apan gitataw usab ni Hife nga gikuhaan nang daan og armas ang mga narelibuhang sakop sa dihang gikustodiya sila sa PNP Holding and Accounting Unit.
