Giimbestigaran pa sa PNP ang buybust operation nga nisangput sa pagpinusilay sa dakbayan sa Sugbo kagabii kung diin patay ang usa ka police officer.
Una niini, nipahigayon og buybust operation ang PNP Drug Enforcement Group (PDEG) kagabii sa Sitio Tabada, Brgy. Mambaling, sa nahisgutang dakbayan.
Matud sa hepe sa Mambaling PNP nga si Police Captain Renz Talosig nga misangput sa pinusilay ang maong operasyon human nakorner sa kapulisan ang wala pa mailhing mga subject.
Nakaangkon og samad-pinusilan ang sakop sa PDEG nga si Police Senior Master Sergeant Maximo Macua maong gidala kini sa tambalanan apan namatay kini kadugayan.
Apan pagkalabay sa pipila ka oras, nasikop dayon ang mga drug suspect nga silang Ronald Sagarino at Frasco Obeso.
Anaa karon sa kustodiya sa kapulisan ang duha ka mga dinakpan.
Mipasalig si Police Regional Office-7 Director B/Gen. Albert Ferro nga hatagan og honors ang pulis kinsang namatay atol sa shootout.
