CEBU CITY — Giimbestigaran karon sa PNP ang pagpamusil-patay sa usa ka sakop sa 2nd Provincial Mobile Force Company (2nd PMFC) sa Brgy. Bugas, lungsod sa Argao, Cebu.
Base sa imbestigasyon sa PNP, mibyahe ang biktima nga si Police Corporal Vincent Arboladura paingon sa Argao niadtong Marso 15 sa kaadlawon sa dihang gipusil kini sa wala mailhing riding in tandem.
Matud ni Police Captain Wilfred Barungan sa Badian PNP nga gisubay sa mga imbestigador ang nahitaboan sa krimen aron kuhaon ang CCTV footage.
Gilantaw karon sa mga imbestigador ang anggulong may kalabutan sa trabaho o personal nga maoy hinungdan sa maong krimen.
Gipaubos na karon sa forensic examination ang mga nahipos nga ebidensya gikan sa biktima, lakip na ang narekober nga mga bala sa crime scene.
Ipaubos na usab sa autopsy ang patayng lawas ni Arboladura subay na sa nagpadayong imbestigasyon.
