CEBU CITY– Naa sa kritikal nga kahimtang hangtud karon ang usa ka pumpboy nga gipusil sa usa ka security guard tungod kay nangutot sa usa ka gasoline station sa Sitio Kambarong Brgy. Maghaway Guindulman, Bohol.
Giila ang biktima nga si Marvin Bala-uro 18 anyos ug residente sa Brgy. Talisay Anda Bohol samtang ang suspect ang giilang si Jonathan Perucho , 29 anyos ug residente sa Brgy. San Miguel Dagohoy sa naasoy nga lungsod
Matud ni PCapt Jerry Leones ang hepe sa Guindolan PS nga nagpunay matud pa og pangutot ang biktima hinungdan nga gisita sa gwardiya nga undangon na kini.
Nasuko matud pa ang biktima ug miingong dili angayan nga mag-isog-isog si Perucho tungod kay dayo lang kini sa lugar. Tungod niini, nasuko ang gwardiya ug miingong pusilon niya si Bala-uro.
Gihagit usab ni Bala-uro si Perucho nga testingan siya sa pagpusil hinungdan nga sa walay pagduha-duha gipusil sa gwardiya si Balauro gamit ang shot gun kung diin naigo kini sa may dughan.
Naginhawa pa ang biktima sa dihang nadala sa tambalanan apan 50-50 kini karon tungod sa bala nga mipilit sa atay niini.
Nadetain na usab karon sa Guindolan PS ang suspect ug matud sa hepe nga wala kini nagbasol sa iyang nahimo.
