CENTRAL VISAYAS- Gihimakak sa grupong Philippine Institute of Chemical Engineers (PIChe) Cebu Chapter ang gikatahong usa ka propesyonal ug sakop nila si Stephen Tapulado o alyas “Tepen” nga giingong operator sa narondang Illegal Drug Laboratory sa usa ka apartment sa dalan D. Jakosalem, Barangay Zapatera, ning dakbayan sa Sugbo niadtong Lunes, Hunyo 30, 2025.
Kini ang nahimong pamahayag sa grupo pinaagi sa usa ka Official Statement sa ilang social media account niadtong Miyerkules, Hulyo 2 diin mihatag kini og katin-awan sa nahimong detalye sa balita sa pipila ka mga mantalaan ug sibyaanan sa maong operasyon sa mga awtoridad.
Gani sa unang bahin sa pamahayag niini kay gidayeg nila ang nahimong aksyon sa kapulisan ug uban pang tigpatuman sa balaod sa nahimong malampusong operasyon aron masikop ang binuhatang illegal.
Gisaysay sa grupo nga subay sa ilang mga kasayuran sa mga akademikong institusyon ug sa datus sa Professional Regulation Commission (PRC) kay walay naghisgot nga lisensyado o gradwar sa Chemical Engineering Program ang dinakpang si alyas “Tepen.”
Nakahatag kini og kalabaka bahin nila tungod nakatampo sa bati nga reputasyon batok sa ilang propesyon.
Giawhag niini ang tanang mga media outlets sa pag-eherhisyo sa due deligence ug accuracy sa responsableng journalismo sa pagpatigbabaw sa kamatuoran para sa kaayuhan sa kinabag-an.
